-دينا عبد الحميد- اول مرشحة امرأة لأنتخابات الرئاسة لعام 2011

دينا عبد الحميد
dinaalex_6@hotmail.com

2010 / 1 / 26

لست مجنونة ولكنى لاحظت وانتم كذلك انه لا يوجد مرشحة امرأة واحدة في انتخابات الرياسة القادمة ..غريبة مش كده واحنا في بلد المفروض انها بتحترم المرأة وبتعامل المرأة على انها مثل الرجل في الحقوق والواجبات ومع ذلك لم اسمع عن امرأة واحدة ترشحت لهذا المنصب او ان احد الجهات مثلا رشحوا أمرأة فقررت ان اترشح لهذا المنصب ليس بغرض الشهرة او طمعا في السلطة فهذه الاشياء لا تستهوينى كثيرا بل بالعكس انا أفضل ان اكون حرة لا يقيدنى منصب او اى شئ من ذلك القبيل وإذا فرضنا انى قد اتخذت هذه الخطوة فأنا قد اعددت برنامج انتخابى عن طموحاتى لبلدنا الحبيب مصر والذي اتمنى من كل قلبى ان يحققه من يكسب في هذه الانتخابات وطبعا لانى مش سياسية محنكة فإعتبروا هذا البرنامج هو خواطر او امنيات او ما تريدون وسزف يكون كالأتى:
1- مدة الحكم مدتين غير قابلة للتجديد نهائي
2- هتبقى الدولة في عصرنا رأسمالية اشتراكية يعنى بين البينين زى اوروبا كده
3- تحقيق العدالة الإجتماعية اللى تضمن للفرد مستوى معيشة مناسب وده بقا بالأتى:
a. تعديل دخول الموظفين بما يتوائم مع الوقت الحالى وغلو الاسعار.
b. تعديل قانون التأمينات الإجتماعية.
c. توسيع مجال الاستثمارات مما يتيح لفرص عمل جديدة.

4- نقل العاصمة "القاهرة" ولتكن " القاهرة الجديدة" نقلها فين لسة معرفش اول ما امسك الحكم ويبقى عندى مستشاريين وحاجات كده هبقى اقولكم لان كمان سنة مش هنعرف نمشى في القاهرة .
5- تطوير التعليم وبدون لف ولا دوران ولا نزود سنة ولا ننقص سنة نشوف المدارس الاجنبية في مصر ماشية ازاى ونقلدهم طالما مش عارفين نبدع .
6- إلغاء الثانوية العامة ووجع القلب وكل واحد يذاكر المواد اللى بيحبها ويدخل الكلية اللى هو عايزها مش اللى ابوه عايزه يدخلها او عشان المجموع كده هيبقى عندنا مبدعين ومخترعين.
7- أن تكون المادة الدينية اختيارية وحسب رغبة الطالب ولا يسأل الطالب عن سبب اختياره او اعتقاده كل واحد حر فيما يعتقد.
8- تعديل قوانين الضرايب الكتير او بالمعنى الاصح تعديل قانون الجبايات الكتير ونخليه في المعقول جباية واحدة او اتنين مش 124587963 جباية حرام.
9- إلغاء القوانين التى تقنن الرشوة.
10- الإهتمام بنهضة الإقتصاد المصري لأن مصر عمرها ما هتقوى إلا بقوة اقتصادها.
11- يرجع عرف الشرطة في خدمة الشعب تانى قولا وفعلا مش الشرطة في ضرب الشعب.
12- الإهتمام بالشئون الخارجية لمصر ولكن في حدود .
13- توطيد الوحدة الوطنية وتحقيق مقولة الدين لله في الجامع او الكنيسة والوطن لجميع المصريين .
14- أما بالنسبة للمرأة ولأنى متعصبة وأعذرونى لبنى جنسي جدا هيبقى ليها النصيب الأكبر في الإدارة وإصدار القرارات لما لها من حكمة وعاطفة اكثر كتير من الرجل وسوف يكون هناك العديد من المراكز المختصة بتدريبها وتعليمها احسن أساليب الإدراة....وفي نفس الوقت لن نضطهد الرجل او نقهره كما فعل بنا قرون عديدة سوف نعطيه الحرية كاملة والفرصة المكافئة للتنافس مع المراة.
15- إلغاء خانة الديانة من البطاقة لأنها في الواقع لا تدل على شئ تثير مشاكل وخلاص واللى يسأل التانى دينك ايه يكون بيعرض نفسه لمسائلة قانونية.
16- أما دور العبادة لأى دين هتكون في حدود المسموح به واللى محتجاه الناس فقط لا غير ويكون تكلفته غير باهظة لانه مكان عبادة مش لازم يبقى النجف فيه ذهب يعنى وهنهتم اكتر ببناء المستشفيات والمدارس وغيرها.
17- قانون يعاقب على العنصرية وكره الاخر .
18- الحرية مكفولة للجميع للتعبير عن أرائهم في كل مكان.
19- اباحة المظاهرات السلمية التى تعبر عن الرأى .
20- من حق الشعب ان يقيلنى قبل انتهاء مدتى عن طريق استفتاء شعبى .
21- تنفيذ القوانين وده اهم من القانون نفسه لان بجانب ان عندنا قوانين منيلة الا انها للاسف مش بتتنقذ صح برضوا والقانون ينفذ على الوزير قبل الغفير ولا احد فوق القانون.
22- ولأنى مع الحرية الشخصية لن امنع الحجاب او ارتداء الصليب ولو انه غير محبذ في المصالح العامة ولكن سوف يتم منع ارتداء النقاب لانه ضار بالأمن القومى وبحرية المواطنين وده في كل مكان في الشارع في المصالح في اى حتة يمنع منعاً تاما.
23- الحرص على ان يكون مجلس الشعب في خدمة الشعب وسن قوانينه لمصلحة الشعب مش ضد مصلحة الشعب.
وارجوا لكم ولى التوفيق



https://www.c-we.org
مركز مساواة المرأة