صرخة مدوية من كل أم و صبية

زهرة الشمس محمد

2013 / 1 / 16

صرخة صبية فاتها حبيب شهيد وراح
صرخة أم مات ابنها على الحدود وراح
صرخة أم ودعت طفلها
لمدرسته فى الصبحية
وهو راخر راح
صرخة أم مجند مات على الحدود
ولما تشوف تعويض ملاليم
تقول الف شكر لربى
أن ابنى مات وإرتاح
صرخة زوجة وفى بطنها شايله جنين
أبوه فاته من قبل ما يشوفه وراح
صرخة زوجة زوجها اتسجن
ظلم فى بلاد بعيدة
وحكومة بلده عارفة تنام وترتاح !
صرخة أرملة بأولاد يتامى
تبكى وتصرخ
وتقول آه يا كسرة الجناح !
بعد المجند ما مات فى قطر الموت
والغنى فى قطر النوم سواح !
تصرخ الصبية .. سامعين؟
تصرخ الأم .. سامعين؟
تصرخ الزوجة .. سامعين؟
تصرخ الأرملة .. سامعين؟
صرخة يا عالم مدوية
تنزف معاها الجراح
تشق هدوم السواد
تاخد فى سكتها كل الأفراح
آه يا شهور عجاف
اتقام فيها عزا يكفى سنين !
وما اتسمع فى لياليها غير النواح
آه يا شهور عجاف
اتقام فيها عزا يكفى سنين !
وما اتسمع فى لياليها غيرالنواح
سامعين؟...حاسين؟ شايفين؟
ما هو اللى ماتوجعش يا ناس
هأيحس ازاى ؟
بحرقة القلب ونزف الجراح
رفعت مظلمتى للفوق
وهو وحده قادر يرفع الظلم
وهو وحده يداوى الجراح
عليه العوض فى اللى جاى
وعليه العوض فى اللى راح
عليه العوض... ومنه العوض
*******




http://www.c-we.org
مركز مساواة المرأة