إزدواجية الأخلاق

فتاة مصرية تنتحر من أعلى كوبري قصر النيل هروبا من متحرش.. ده خبر حقيقي في الصحف المصرية..

إحنا فعلا محتاجين للبنت القوية الشجاعة اللي ترفض الذل والهوان، البنت اللي بتشتغل وبتفكر وبتبدع وتستقل بشخصيتها.. مش الضعيفة اللي بيقهرها المجتمع ويخليها تنتحر وتهرب..

مجتمعنا بداية من الأسرة ثم المدرسة والإعلام والأزهر والكنيسة والثقافة، بيربي الولد على أنه الأقوى وحامي شرف العيلة، وبيربي البنت على السكوت والضعف والخضوع، وعلى أن جسمها قنبلة من العار قابلة للإنفجار..


تكبر البنت وتلعن جسمها اللي بيخليها نهبا لكل ذكور المجتمع..، فهذا الليبرالي يريد تعريته بدعوى الحرية والانفتاح، وذاك السلفي يريد تغطيته بدعوى تعاليم الدين.. والإتنين بيعتبروا نفسهم أوصياء على حاجة مش بتاعتهم.!!، ومش شايفين من المرأة غير جسمها، أو بالأدق هذا الجزء الصغير بين رجليها.. هوس جنسي ينم عن شخصيات سيكوباتية تحتاج لعلاج نفسي..!!
.

الشرف الحقيقي حاجة واحدة للولد والبنت.. الشرف الحقيقي هو الصدق والإخلاص والرقي والوفاء والعفة والأمانة في داخل البيت وفي الجامعة وفي العمل وفي الشارع.. في السياسة والاقتصاد وقبل كل شىء، في الفكر والسلوك..


المقاييس والقيم الأخلاقية تسري على الجميع رجل أو إمرأة، غني أو فقير، مسلم أو مسيحي أو يهودي أو غيره... لكنها للأسف في بلادنا مزدوجة، وعلشان كده مفيش شرف.. ومفيش أخلاق.. فيه تحرش وفيه اغتصاب وفيه انتحار..!!