ضريح السيدة Z

واحنا صغيرين.. قبل ما تهب علينا أعاصير الفقه البدوي من شرق البحر اﻷحمر..فاكر كويس إن والدي لما كان يشتري قماش فستان جديد ﻷختي عفاف او أختي سعاد ..كانت أمي ترسلني لعم عبد الستار الخردواتي..أنا أو أي من أشقائي علشان نشتري اكسسوارات للفستان الجديد..كنا نقوم بالمهمة بحماس وفرح..فستان جديد ﻷختنا هيظهر جمالها وأناقتها..ولو ماعثرناش على اللي عاوزينه عند عم عبد الستار الخردواتي..نفتش في كل دكاكين القرية وممكن نروح مدينة بلقاس المجاورة..ﻻزم نلاقي الأكسسوارات اللي تظهر أناقة اخواتنا البنات..ومكناش حالة استثنائية..دا كان حال كل أسر القرية
..كل أسر مصر ..وكل الشباب بيتعاملوا مع البنات باحترام ويحافظوا عليهم كأنهم اخواتهم..كانت حوادث التحرش نادرة..والبلد تهتز لو حاجة حصلت من النوع دا..وكانت المشاعر الرومانسية تشيع مع أغاني ثومة والعندليب..وأفلام فاتن وشادية..وأطلال ابراهيم ناجي..
ولو شاب تعلق بفتاة كان بينظر لها كطيف أثيري انبثق من أشعة شمس صباح شتوي دافيء..كان الدين فروض تؤدى ببساطة وعفوية ..وسلوك إيجابي ..نادرا ما كنت تصادف حد بيرمي زبالة في الشارع ..وصعب إن تلاقي موظف ماسك سبحة والسجادة على مكتبه و لما مواطن يطرق بابه يطلع عينه ! ..
فماذا حدث..؟
مع أعاصير فقه الجاهلية الجديدة اللي هب علينا من شرق البحر اﻷحمر من سبعينيات القرن الماضي..داهمنا مشايخ البترودوﻻر برؤية أخرى.
من منظورهم غير اﻻنساني..أختي وأختك...أمي وأمك..ماهن إﻻ مخالب غواية ..سلطها الشيطان على الرجال للإيقاع بهم في مستنقع الخطيئة..ولورجل أخطأ يبقى السبب في الشيطانة اللي أغوته!
والحل.. زنزنة بنتي وبنتك.. أختي وأختك ..أمي وأمك.. في نقاب..مش بس لتغطية الوجه .. فميظهرش ولو شبهة إغراء لذكور القبيلة
" قرأت مرة فتوى لأحد مشايخ الجاهلية الجديدة أن النقاب ينبغي أن يكون بعين واحدة ولايشف شيئا حتى العين نفسها ..هذا يعني أن غالبية من يرتدين النقاب لايلتزمن بتعاليم الدين .حين يرتدين نقابا بعينين !!!".
نقاب مشايخ الجاهلية الجديدة شامل ..كفن ..هدفه إخفاء كل مافي المرأة.. ..
فكل مافيها عورة وعار ..حتى صوتها ..حتى اسمها!
.....
خلال زيارتي اﻷخيرة لقريتي ..جلست مع بعض الشباب
..فإذا بشاب يترجل من على موتوسيكل ويقوم بتوزيع دعوات لحضور حفل زفاف..تناولت واحدة من هذه الدعوات..وبدأت أتصفح ماهو مكتوب..
اسم العريس:
مهندس عماد علي
اسم العروس : الآنسة
R
-أيه ياجماعة..فين اسم العروسة..ليه مش مكتوب ؟
أحدهم تطلع إلي
باستهجان ورد :إزاي يا استاذ محمد عاوزنا نذكر اسم البنت !!!!!
سألته في استغراب : وليه ﻷ ؟!!!
فصاح في انفعال :دا عيب يا استاذ..ذكر اسم البنت في دعوة توزع على الناس عيب..!!!
ياه..لحظتها ..عرفت اد أيه المسلمين .. مليارات المسلمين عبر اكتر من 14 قرن..ارتكبوا -ومازالوا- الفواحش والكبائر ..لما بيرددوا اسم أمهات المؤمنين ..خديجة و عائشة و فاطمة وزينب ونفيسة ..وحتى آمنة أم الرسول الكريم.. هكذا عيني عينك ..وندعي أننا بنحبهم ونجلهم ..لو كنا بنحبهم صحيح يفترض ألا ننطق اسم أي منهم ..بل الحرف الأول فقط ..وبالانجليزي " لاأدري لماذا يستخدم أهل قريتي الحروف الانجليزية كناية عن اسم بناتنا وسيداتنا ".
وبالتالي نقول ضريح السيدة z وضريح السيدة N
إذعانا لتعاليم الدين ..بالطبع ..دين مشايخ الجاهلية الجديدة..وليس دين الله !!!!!!
.....
ملحوظة..
هذا الشاب الذي استهجن سؤالي خريج كلية التجارة ..أي أمضى في صفوف التعليم 16 عاما..!!
أما والد العروس فموظف بالمحليات..
وماذا عن العروس ؟
جامعية ..تسعى للعمل كمدرسة ..مربية ﻷبنائنا وبناتنا!!!!