عقدة النجاح والتفوق في التعليم

كان في فيلم هندي بيقدم رسالة هادفة
اسمه نجوم على الأرض
للمخرج والممثل العبقري عامر خان

..بيحكي عن طفل صغير عنده ٨ سنين بيعاني من صعوبات التعلم ، الخطأ في كتابة الكلمات وتغير اتجاهات الحروف من اليسار لليمين ، وعدم إدراك أبعاد الأشياء ، والصعوبة الشديدة في التركيز والتذكر وده بيسمي في علم النفس (الديسلكسيا ) او عسر القراءة.
و طبعا الموضوع ده خلاه دايما ضعيف و بيسقط في كل المواد .
كان نفسيته مدمرة وكل حد يكلمه ميردش باباه ومامته دخلوه مدرسة داخلية عشان يرتاحوا من مشاكله وكانوا مقصرين في زيارته وبيعاملوه بمنتهى القسوة وشايفينه فاشل ومش نافع وكانوا دايما بيقارنوا بينه وبين اخوه الأكبر انه افضل منه ومتفوق عنه. .. و الولد تايه في الحياة ..مش لاقي حب و لا حنان ..مش لاقي تقدير و لا احترام
لغاية ما جه مدرس قدر يفهم حالته النفسية وابتدي يقرب منه و يتعامل معاه ويهتم بيه و يفهم أهله مشكلته ..المهم الولد تعلق بالمدرس و لقى عنده الحب و الحنان و الاحترام و التقدير اللي ما كانش لاقيهم من حد...الطفل اتغير حاله و بدأ يتحسن دراسيا ..و ظهرت موهبته القوية في الرسم والتلوين و فاز بالمركز الأول في مسابقة المدرسة للرسم فوراً جري على حضن المدرس
وبكي وشكره
الفيلم ده بيجسد معاناة الأطفال في المدارس وف البيوت .. أطفال بمستويات و قدرات مختلفة ..و بتتعامل معاملة واحدة.. امتحانات واحدة ..مواد واحدة..بكل أسف
بيجسد كمان دور المدرس ..اللي كان فاهم آنه بيأدي رسالة و بيربي و خلاص
الطفل محتاج لدعم وتشجيع عشان يقدر ينجح و يتخطى الصعوبات اللي بتواجهه في حياته ..
واجب كل أب و أم يراعوا اختلاف قدرات ولادهم و ياريت حقيقي تقدروا إن نظام التعليم هو اللي قاسي و مش بيراعي الفروق الفردية ..
خليكم دايما السند و الأمان لولادكم .

وان. العلاقات الإنسانية مع ولادكم أهم من الإنجازات. والدرجات والتفوق في التعليم لان كل ده بيتنسي

التفوق والنجاح في حاجات تانية غير التعليم
وان النجاح ليس له وجه واحد بل كل وجه له نجاحه
صحيح ان النجاح الدراسي اساس ولكنه ليس الشرط الوحيد لتميزهم

كل الولاد جميلة ..زي النجوم في السما