السمكات الثلاث

كان ياما كان ياسعد يا اكرام ، كان فيه ثلاث سمكات اصحاب جدا ، وعايشين فى سعادة فى بحيرة منعزلة .

السمكة الاولى كانت جميلة ومغرورة ، والثانية كانت قليلة الحيلة ، والثالثة كانت شديدة الذكاء ، وبالرغم من اختلاف طباعهم كانوا عايشين فى جو من الالفة والمحبة .

وفى يوم من الايام ، صيادين السمك كانوا ماشيين بيدورا على شط جديد يصادوا منه سمك ، ورغم انهم بيصطادوا من النهردايما الا انهم لم تلفت انتباهم هذه البحيرة المنعزلة .

قالوا نشوفها ، فوجئوا بيها مليانة سمك وكبير ، وتقريبا نظرهم جه على السمكات الثلاث المربرين علشان كانوا بيلعبوا بمرح والمياه صافية .

الصيادين تاملوا مياه البحيرة والسمك بيلعلط وقالو بكره نحضر عدة الصيد ونيجى نصطاد .

السمكات الثلاث سمعوا الصيادين وعرفتوا نيتهم ، يعملوا ايه يعملوا ايه ، السمكة الاولانية المغرورة قالت لو جم هجرى منهم .

والسمكة الثانية استهترت وما فكرتش فى حيلة تنجو منها وقالت ساعتها يحلها حلال .

السمكة الثالثة الذكية ، قعدت تعوم و تفكر وتفكر ، قالت اكيد البحيرة دى لها مصدر بيغذيها بالمياه ومش معقول مقفولة ،

وقعدت تعوم وتعوم وتبحث لغاية ماوصلت الى المكا ن الضحل الى بيدخل ميه للبحيرة بالمياه وجاى من النهر ، قعدت تسبح بصعوبة فى الميه الضحلة دى ، وانتقلت للنهر ونجت من المصير المحتوم .

جم الصيادين تانى يوم ، واول نزول للطعم وقعت السمكة الاولى المغرورة فى الطعم واصطادها الصياد ،

السمكة الثانية غارقانة فى حيص بيص ، عمل ايه اعمل ايه ؟ قالت احست حاجة اعمل ميتة واطفوا على سطح الميه .

وفعلا عملت ميته ، خدها الصياد ورماها بعيد عنه على الشط

ظلت صامته بلا حراك ، واستغلت انشغال الصيادين باكمال الصيد وقفزت قفزة عظيمة الى قاع البحيرة ونجت .

دى كانت قصة السمكات الثلاث بتحوير من كتاب كليلة دمنة وهى رسالة جميلة تنبه الناس الى ضرورة اليقظة وعدم الغفلة والتصرف بذكاء وتفكير مع مواقف الحياة المختلفة

وتوتة توته فرغت الحدوته .حلوة ولا ملتوتة ؟