صديقي الشرقي والجنس

أحمد سعده
ahmedseada9@yahoo.com

2014 / 12 / 28

بص يا صديقي.. مش إنت ولا مراتك ولا أي حد اللي اخترعتوا الجنس.. ولا هو حاجة قذرة ودنيئة زي ما انت متخيل.. الجنس حاجة كده هدية من ربنا للإنسان، وحياتنا مبتكملش غير من خلاله..
جمال الوردة جنسي جدا بيخلينا مذهولين.. العصفور اللي انت شايفه دلوقت وسامع تغريده بينادي على حبيبته علشان تشاركه سعادته.. أينما تواجد الجمال، تواجد الجنس البريء.
خليك دايما واضح وصريح، وقبل كل شيء بريء في الموضوع ده بالذات.. الموضوع ببساطة رجل ومراته، مجرد إنسان وإنسانة بيحسوا في وقت بعينه إنهم عايزين يبقوا مع بعض بشكل وجودي أعمق من وجودهم الحالي..
- يأخذ نفسا عميقا من سيجارة لا أثق تماما في محتواها ويقول: بس هي جريئة أوي بشكل بيضايقني.. ودايما عايزة تبقى فوقي زي الأجانب..!!
ههههههههه.. شكلك واخد موقف من الوضعية دي… عايز دايما تبقى إنت فوق.. أناني ومتكبر، وعقلك مسيطر عليك.. ولمعلوماتك البدو والأفارقة مكنوش يعرفوا غير الوضعية دي، واستغربوا جدا بعد كده من وضعية الرجل فوق المرأة وكانوا فاكرين إنه كده بيقتلها.
البدو الأوائل يا صديقي كانوا شايفين إن وضعية الرجل فوق المرأة، وضعية عنيفة… لأن المرأة هي الأرق والأنعم علشان كده لازم تبقى فوق الرجل... شفت التحضر والرقة؟!
- مراتي رقيقة جدا، وبحبها أوي.. بس الموضوع ده بيعملي قلق.
لما تحاول تظهر حبك لمراتك، دوب فيها وفي الدفء اللي بتحسه في حضنها… وانسى الجنس وحطه على جنب… إركن راسك شوية.. وخللي الجنس عذري خالي من الأفكار والمخيلات اللي مسيطرة عليك.. وقتها بس هتحس إنك بتطلع لفوق.. لفوق.. للسماء.. وقتها هتحس انك مستسلم للي بتفرضه عليك اللحظة، مش لأفكارك وخيالاتك ومخططاتك..
معظم البشر فاهمين الجنس مجرد شهوة وهيجان وطاقة زايدة لازم يتخلصوا منها.. مجرد عملية قذف بائس. وده سبب إن معظم العلاقات الزوجية مبقتش تعرف غير نتيجة واحدة: البؤس والشقاء.. علاقة فقيرة وآداء باهت وتضييع للطاقة والوقت وبعد كده إحباط ويأس.. علشان ضيعوا طاقتهم من غير ما يحسوا بأي نعمة أو نشوة..
النشوة يعني لقاء الكون والوجود اللي بييجي من خلال بوابة العلاقة الحميمة.. وملايين الزوجات يا صديقي إتولدوا وعاشوا وماتوا من غير ما يعرفوا إنهم كانوا ممكن يوصلوا للنشوة الحقيقية.. وبتفضل مجرد كلمة يسمعوا عنها...
مراتك مش مطالبة طول الوقت إنها تسعدك وتحرم نفسها من إنها تتعامل بطبيعتها وفطرتها.. وتقنع نفسها إن ده مش من حقها زي ماالمجتمع بيقولها... سيبك من كل الهبل ده.. لو مكنتش العلاقة الحميمة هتخليها تحس بنسيم الحياة وبالراحة والنعمة الروحية، يبقى إيه فايدة انها تتعب وتضيع طاقتها ووقتها؟
- يا عم إنت هتودينا في داهية؟!
هههههههه.. بص يا حبيبي.... حالة الحب بين الرجل ومراته بتخلق دايرة من الذبذبات والطاقة بينهم... وبتشحن كل طرف منهم بطاقة الآخر، فيخرجوا من الممارسة كلهم حيوية والنضارة مالية وشهم.. علشان كده لاحظ إن فيه بنات بتحلو بعد الجواز..
وأكبر خطأ دايما في العلاقة هو الاستعجال.. لأن القطب الموجب عند الرجل دايما جاهز ومش محتاج مقدمات.. لكن القطب السالب في المرأة يكره الدخول مباشرة في العلاقة بدون مقدمات.... وعلشان كده لازم الرجل يجهز قطبها السالب عن طريق العزف على كل أوتار جسمها..
- يضحك ويقول: إنت قلبتها كيمياء وفلزات.!!
هههههه.. فيه فرق بين ممارسة الجنس، وممارسة الحب اللي هو أصعب بالمناسبة.. ومعظم الرجالة بيمارسوا الجنس مش بيمارسوا الحب.. علشان كده بيبدأوا العلاقة الجنسية وينهوها في دقايق، والزوجة تقعد تراقب اللي بيحصل مذهولة وممكن مشمئزة وقرفانة لأنها أصلا لم تستثار.. وبعد كده يوهم الرجل نفسه هو وصحابه بقصص سخيفة تعيسة مناسبة لوعيهم وجهلهم..
ونتيجة الجهل ده، تظهر كل التناقضات القبيحة المرضية والمتطرفة في المجتمع.. فتلاقي مجتمعات منحلة كلها دعارة وجنس رخيص... ومجتمعات مكبوتة مقهورة تبالغ في حرمانها... والمجتمعين مرضى محتاجين يتعالجوا...
وعلى فكرة يا صديقي الإنسان المنحرف أو الإنسان المكبوت، كلاهما لا يستطيع البحث عن الله.. فالمنفلت سيتشدق بشعارات الحرية وغيرها... والمكبوت سيلجأ للنفاق بإسم الدين...



https://www.c-we.org
مركز مساواة المرأة